如果同我相熟的 VGC 玩家都可能會知道，其實我唔想自己有太高的「曝光率」。所謂的「曝光率」就是例如我三月 PC Report 或台灣遊記都有提到，比賽片段及比賽結果顯示玩家全名的情況。
舉例來說：六月四日的 PC 賽八強賽完了之後，由於我四強賽要對上 Jason 所以要上 stream。我見到八強 stream 上 kdmc 的玩家名稱寫住「KDMC」，我就話「又話唔可以寫 nickname 既做咩寫 KDMC 架，咁唔好寫我全名啦」；商討下的結果就 initials+姓，勉強都算接受到既。(然而最後公佈賽事結果的網頁仍是寫我全名 =[ ) (我對於我得到第二名的 PC Spring #1 只有直播沒有重播及沒有貼出賽事結果是感到相當幸運~)
我參加 VGC 比賽只係 just for fun，無乜點諗過話要去世界賽甚麼的；而且我從來都認為 VGC 同最近財政預算案中提到的電子競技 (e-sport)，完全係沒有沾上半點關係 (呢個有機會再講)。簡單咁講：我作為 casual player，我唔想因為我玩遊戲偶爾玩得比較好，自己的個人資料 (包括全名) 就無端端「被出現」在甚麼公開的網頁上。在個人資料的處理上，香港比賽主辦方也經常犯傻：好像最近的 VGC Hong Kong Open 的網上報名，有一段短時間是當你填完表後，你可以看到所有人的填表記錄，當中還有參加者的出生日期。。。
唔知係咪因為而家社會的扭曲，導致有好多 narrow-minded (open-minded 既相反) 的人種，例如去年因為遊戲的中文譯名問題而跑出來搞甚麼遊行至日本大使館的人便是一例。呢度我想講既 narrow-minded 的就主要係輕視「玩電子遊戲的人」的人。
呢種思想的人基本上係隨處可見 (相信各位玩家都會有類似感受)，我的情況就慘 d 仲包括埋我屋企人。唔知係咪受大眾傳媒的渲染所影響，他們會將「玩電子遊戲」跟「對心智有負面影響」扯上關係。我小時候自己儲零用錢來買了一部 NDS 來玩，結果被屋企人發現之後無端端就被罵了一頓浪費金錢荒廢學業甚麼的 (雖然過左半個月屋企人先發現，還好沒有被沒收)，然而即使買了 NDS 我的成績亦一直都沒下滑，他們也奈何不了我。
即使到了現在，他們的想法仍然沒有絲毫改變。例如我有一日講「我月尾要同朋友去台北 Regional」，我就接近每日聽到一句「你咪縰錢做埋 d 無聊野啦」。我心諗：我去 Regional 當天只用處理吃東西的開支，如果普通去旅行唔係要消費更多嗎？當然我而家有正職而且家用水電煤又係我俾緊，實際上我要去根本無辦法阻止我。
最可惡的就是有呢種想法的人還有不少是雙重標準。例如去年我打算看 2016 Pokemon 世界賽的直播，因為世界賽是在美國舉行，換言之香港時間是晚上至翌日早上。我提起看世界賽直播就遇過兩種人：
1. 說這是玩遊戲無聊云云：我知道同我講呢樣野既人係會通宵睇足球比賽直播，我就反駁他「咁你通宵睇足球比賽做乜呢? 你平時都唔踢波睇足球比賽唔無聊咩? 至少佢比賽個隻 game 我係成日都有玩呀~」
2. 說這是玩遊戲沉迷云云：我完全唔明睇比賽直播同沉迷究竟有乜叉關係，唔通睇既係玩遊戲就可以拼上「沉迷」一詞? 然而他是會為了玩 Pokemon GO 而跑出街外抓精靈的 (記住：世界賽是在八月，香港是夏天，天氣咁熱我真係唔會為左玩 Pokemon GO 係街度行幾粒鐘)，這樣就不叫「沉迷」我真的完全無語。
由於以上 narrow-minded 的人很容易就會將人標簽化，所以盡可能我都唔想咁高「曝光率」，以免招致不必要的麻煩。唔好話呢個係我既價值觀既問題，我身邊既人就係咁既價值觀；你要說服我唔好有咁既諗法，請你先去說服所有 narrow-minded 的人。
(原因就到這裡。如果你看本文的目的只是想知道原因，咁可以唔洗睇落去。之後純粹只是我表達不滿，順便當是舉出另一種 narrow-minded 的例子。)
好終於說回正題，我正職係一名 Analyst Programmer，我在數碼港返工 (VGC Hong Kong Open 也是在數碼港，住新界的我每朝搭車返工，都知數碼港呢個地方有幾遠呢)。我返工個度就有分 contract staff 同 perm staff，而我就係較為少數的 perm staff 黎既。平時我就跟坐附近的 contract staff 一起食 lunch，偶爾我也會跟其他 perm staff 一起出去食 lunch，亦有時會帶飯、自己食飯或者約附近數碼港返工的朋友食 lunch。
我由畢業到出黎做野只有短短幾年，職場的甚麼政治我都不是太懂啦。我同 perm staff 出去食 lunch 聊天既感覺，比起跟 contract staff 感覺要舒服得多。與我出去食飯的 perm staff 們都在數碼港這裡工作超過四年了，他們有一次跟我說：「不要跟 contact staff 的距離太近，不然很容易吃虧」。這點我諗我都大概明白，畢竟 contract 跟 perm 的合約條款不同，始終距離太近始終會是 perm staff 會比較輸蝕，然而我一直都不明白這句話的真正意思。
而跟我食飯的 contract staff 則是我剛上班的時候同 team 的同事，現在我在另一 team 因此工作上跟他們沒有太大交流；只是既然習慣一起出去食 lunch，於是就繼續跟埋出去食咁解。他們食飯的時候講的話題我多數是一點興趣也沒有：例如他們會說鄰組的女同事們的甚麼、又或者是昨晚的劇集甚麼有趣的劇情跑出來，我最能跟他們搭得上嘴的就是最近的新聞了。漸漸地跟他們食飯的時候，我開始自己玩電話 (鯉魚王都幾好玩 =P)。
而那群 contract staff 的一些行為是相當煩擾及反感。例如有一次我跟附近數碼港返工的一位舊同學食飯，剛巧那位是女同學，換言之就係一男一女出去食啦。而剛巧我地兩個人跟那群 contract staff 搭同一架車出去食飯就見到喎，咁返到去佢地就好煩咁「女朋友黎架?」「ok 喎個樣」「介紹俾我識啦」；唔知既話我真係會以為佢地係從基路比既基佬竇走出黎，成世未見過女人。跟住每隔幾日又會有新野「我見到你前幾日同你食飯條女同另一個男仔出去食喎」、「她都係唔岩你架啦算啦」、「你係咪收左好人卡呀」，其實我有清楚解釋同我食飯個個係同學黎，會唔會諗多左少少呢? 真係好煩囉。
舉多另一個例子，咁我三月尾就去左澳門參加某群組的非官方 VGC 比賽 (當然係慘敗啦)，循例上我都會買手信俾同事既，所以就在碼頭買左杏仁餅。我帶左兩盒返 office，因為是獨立包裝而且數量有限，所以我在盒上寫 "1 pack for each person only" 放左係自己個位度叫人黎拎，結果我朝早開完會返位兩盒杏仁餅唔見左，尋找後就發現放左係佢地自己個堆 contract staff 既食物竇度，咁係咪即係同我同 team 既人唔洗食呢?
(ps. 以下的 whatsapp group 全是同一個 group，當中只有我是 perm staff so9sad)
我諗無乜邊個唔知「如果我地真係想拎走晒唔比其他人食既話.... 你就唔會有機會拎番走喇」其實即係講緊「係我拎走既吹咩」；仲要話 1 pack 代表一盒誤會左既大話都講得出，簡直係既自私又無恥。我跟 perm 的同事提起此事，他也說「contract staff 有時係鍾意玩下 perm staff，呢個佢地擺明係玩緊你，為左避免呢個情況我通常去旅行都唔買手信俾佢地」咁我又唔會話唔買手信咁衰既......
而家網絡十分發達，基本上 Google 大神可以解答大部分問題。他們透過 Google 我全名，因而得知我有玩 VGC。因為我有時會在 YouTube 中看有關 VGC 的 channel 例如 Cybertron 或者是 HUGO 的 channel，他們找出的網頁中所指的無疑就是我。發生左呢件事之後，我有諗過之後唔再出席 VGC 的比賽；不過既然俾人知道左都無辦法，無謂斬腳趾避沙蟲而唔玩 VGC 啦。
他們 d 邏輯仲好搞笑架，咁我三月的 PC 賽贏左嘛；他們又從比賽結果中看到我贏了比賽，無端端就話「攞冠軍是不是應該請吃飯？」。我以個人身份去玩贏到比賽，而呢個比賽係無獎金，我做乜要請食飯？就算有獎金我都係請幫我贏到個 d 人啦，幾時會輪到一堆既嘔心又反感的無聊人？
好多時我已經唔理他們，諗住他們會覺得悶就唔做 d 無聊野；怎料他們還繼續變本加厲，單以台灣的 regional 相關的就已經發生左兩件事：
1. 因為我去台灣都會去周圍行下，就順便問下他們台灣有咩地方好去。遊記中也說過，我是第一次坐飛機；基本上我是極少去旅行，所以我出來工作以來都無乜放過長假。結果又係多謝 Google 大神過了一會 whatsapp 就出現左呢個 status，不解釋了不過真係「うるさい！うるさい！うるさい！」(「好煩呀！好煩呀！好煩呀！」《灼眼的夏娜》)
2. 因為申請入台證的職業欄位並沒有 "IT staff" 或者 "Programmer" 之類的選項讓我選，所以我就係呢個 whatsapp group 度問啦 (為左分辦係唔同人的 message，我用左唔同色黎塗)，答「電競玩家」既人你係咪腦殘？又話答我縰氣又答「電競玩家」又戇九，呢 d 咁既人先係真正縰氣兼戇九。我無將選項貼出黎係唔太恰當，但其實填入台紙的網頁是不用登入，既然 Google 我全名都咁快，Google 一下很容易便可以找到它有甚麼選項吧？
今天，最不想看到的事終於發生了：他們找到了 leaderboard 還貼了出來。我完全理解唔到貼出黎既意義何在，如果揀 Not Opted into Rankings 都睇到自己幾多 CP 同比賽 standing 我一定會揀 Not Opted into Rankings，雖然我已經揀左顯示 screen name，但因為 screen name 個名同我本來的 YouTube channel 名 (他們找到我的 YouTube channel，雖然改唔到 channel 網址，但我因此改了 channel 名) 相似，所以很容易便辦認到。
你自己八卦完都算啦，唔好唱通街唱到連當事人都知囉。我覺得呢 d 人唔去做娛樂新聞既狗仔隊入黎做 IT 簡直係浪費人才，不過咁講：返 office 有冷氣又有電腦，而家天氣咁熱做狗仔隊應該都幾辛苦。對住呢班人簡直係超級反感。
「你。地。班。人。真。係。好。煩。呀」
所以我今天就受夠了選擇按了 quit group。我按完 quit group 又有人再加返，我已經開到聲話唔好再加返都仲要加返。「沒有最無恥，只有更無恥」，我唯有 block 晒呢個 group 既所有 admin (因為只有 admin 可以加人入 whatsapp group，而我 block 左既 admin 就加唔到我)。順帶一提，admin 們全部無四字頭都有三字頭仲已經結晒婚，男性；究竟結左婚既 IT 男到中年係咪會因為太大壓力，所以成日先會咁得閒做埋 d 咁無聊既野呢？
或者係成個過程上我有處理得唔好既地方，不過有 d information leakage 我係無辦法控制到，而我只能夠做我控制到的事。情況就好似我的三月 PC 我的 Lele 裝速專鎖左招，我就只能選擇出同一招或者換走無得做其他選擇咁，所以就我選擇左 quit group。從此以後，我會作為 perm staff 同工作上的 contract staff 保持一定的距離，至少返呢份工應該要係咁，以此為誡。
我覺得我唔打完呢篇文，我睇黎都無乜心機去玩 HK Open。而家打完就心情好左好多，聽朝訓醒應該有心機去諗隊喇~~
沒有留言:
發佈留言